ՀՀ Կոտայքի մարզի Բյուրեղավան բազմաբնակավայր համայնքի հնգամյա 2023-2027 թթ. զարգացման ծրագիրը մշակվել է՝ հիմք ընդունելով «Տեղական ինքնակառավարման մասին» ՀՀ օրենքով սահմանված՝ տեղական ինքնակառավարման մարմինների իրավասություններն ու լիազորությունները նրանց գործունեության ոլորտներում, ծրագրի մշակման և կառավարման վերաբերյալ համապատասխան հոդվածների դրույթները, ինչպես նաև Հայաստանի Հանրապետության տարածքային կառավարման և ենթակառուցվածքների նախարարության կողմից ներկայացված համայնքի զարգացման ծրագրի մշակման մեթոդական ուղեցույցը:
Ծրագիրը համայնքի սոցիալ-տնտեսական իրավիճակի համալիր վերլուծության և առկա հիմնախնդիրների բացահայտման, ֆինանսական, տնտեսական, բնական և մարդկային ռեսուրսների գնահատման արդյունքում ձեռնարկվելիք քայլերի ամբողջությունն արտահայտող փաստաթուղթ է, որը ենթադրում է հիմնախնդիրների արդյունավետ լուծում և համայնքի տեսլականի իրականացում։ Բյուրեղավան համայնքի հնգամյա զարգացման ծրագիրը համահունչ է և բխում է ՀՀ կառավարության ու Կոտայքի մարզի զարգացման ծրագրերից։ Հնգամյա զարգացման ծրագրերի կազմելու համար հիմք են հանդիսացել համայնքի 3 բնակավայրերում իրականացված հանդիպումներում բացահայտված հիմնախնդիրները, ինչպես նաև ՏԻՄ օրենքով սահմանված և համայնքի հնարավորությունների շրջանակում իրագործելի պարտադիր խնդիրները, որոնց համար ծրագրում ձևակերպվել են առանձին նպատակներ։ (Համայնքի ավագանու 2023 թվականի փետրվարի 27-ի N 17-Ա որոշում):