Համաձայն տեղական ինքնակառավարման մասին Հայաստանի Հանրապետության օրենքի 102-րդ հոդվածի՝ Հայաստանի Հանրապետության Կոտայքի մարզի Բյուրեղավան համայնքում 2017 թվականի նոյեմբերի 5-ին անցկացված համայնքի ղեկավարի և ավագանիների անդամների ընտրությունների արդյունքների պաշտոնական հրապարակմանը հաջորդող օրը՝ 2017թվականի նոյեմբերի 11-ին,  Կոտայքի մարզի Բյուրեղավան, Ջրաբեր և Նուռնուս համայնքների տեղական ինքնակառավարման մարմինների լիազորությունները համարվել են  դադարած և այդ նույն օրը միավորված Բյուրեղավան  համայնքի տեղական ինքնակառավարման մարմիններն ստանձնել են  իրենց լիազորությունները:

Այսպիսով ձևավորվել է խոշորացված Բյուրեղավան համայնքը իր բնակավայրերով՝ Բյուրեղավան քաղաք, Նուռնուս   և Ջրաբեր  գյուղեր:

Բյուրեղավան  քաղաքը գտնվում է  Հայաստանի  Հանրապետության Կոտայքի մարզի  հարավ-արևմտյան մասում: Քաղաքն ունի ավելի քան 10.700 բնակիչ, գտնվում է Երևանից 20կմ հեռավորության վրա, Հրազդան գետի կիրճի ձախ ափին: Քաղաքի վարչական տարածքը կազմում է 372. 48 հա, գյուղատնտեսական նշանակության հողերը`6.16 հա, բնակավայրերը զբաղեցնում են 228. 45 հա, արդյունաբերական, ընդերքօգտագործման և այլ արտադրական նշանակության օբյեկտները` 111.42 հա, էներգետիկայի, տրանսպորտի, կապի և կոմունալ ենթակառուցվածքների օբյեկտները`  9.94 հա, հատուկ պահպանվող տարածքները` 5.52 հա, ջրային հողերը` 1.46 հա, պետական սեփականություն հանդիսացող հողերը` 9.53 հա: Քաղաքը գտնվում է առողջարանային գոտում` «Արզնի» հայտնի առողջարանի անմիջական հարևանությամբ: Օդը մաքուր է, իսկ ջուրը Նուռնուսի սառնորակ աղբյուրներից է գալիս: Կլիման մեղմ է. ամառը` զով, իսկ ձմեռը` ոչ ցրտաշունչ: Քաղաքից երևում են Արարատ, Արագած, Հատիս և Արա լեռները: Քաղաքը արևելքից, հարավից և արևմուտքից սահմանակից է Արզնի գյուղական համայնքին, արևմուտքից և հյուսիսից` Նուռնուս բնակավայրին: Որպես բնակավայր Բյուրեղավանը գոյություն է  ունեցել 1945 թվականից:

Բնակավայրը Բյուրեղավան է անվանակոչվել  1974 թվականին. նախկինում կոչվել է Արզնի բանավան։ Բյուրեղավանը քաղաքի կարգավիճակ ստացել է 1994 թվականին:

Խորհրդային տարիներին Բյուրեղավանը հանդիսացել է արդյունաբերական խոշոր կենտրոն: Այստեղ կառուցվել են միութենական և հանրապետական նշանակության գործարաններ և բազաներ: Այժմ այդ արտադրությունները չեն գործում, կամ գործում են  իրենց հզորությունների շատ չնչին ծավալով:  Բնակավայրում կայուն զարգանում են առևտրի և սպասարկման փոքր և միջին ձևերը: 

Բյուրեղավանում վերջին տարիներին վերականգնվել են հանգստի և կանաչ գոտիները, փոքրիկ բյուրեղավանցիների համար կառուցվել են մանկական խաղահրապարակներ, տեղադրվել  կառուսելներ:

Աչք են շոյում գիշերային լուսավորությունը, բարեկարգ, մաքուր փողոցները: Քաղաքն ունի իրեն հատուկ կոլորիտ, աստիճանաբար ձևավորվող ճարտարապետական ընդհանուր դիմագիծ: Քաղաքի սկզբնամասում, այցելողներին երևում է քաղաքի հուշահամալիրը, որը դարձել է ուխտատեղի երախտապարտ բյուրեղավանցիների համար: Քաղաքի արևելյան հատվածում բարձունքի վրա կա փոքր եկեղեցի, որտեղից բացվում է գեղեցիկ տեսարան: Կենտրոնական` Զորավար Անդրանիկի փողոցի ամենաբանուկ հատվածում գտնվում են առևտրի և սպասարկման կենտրոններ: Քաղաքի կենտրոնում կառուցվում է սուրբ Մարիամ Աստվածածին  եկեղեցին, որտեղ կկատարվեն ավանդական ծիսակարգեր: Հիմնովին վերանորոգվում է  Մշակույթի տունը, հիմնվում է հանգստի գոտի: Կան էլի շատ ծրագրեր, որոնց իրագործման համար, բնականաբար, անհրաժեշտ է ժամանակ: Բյուրեղավան քաղաքն այսօր իսկապես բյուրեղի է նման՝ իր աշխարհագրական գրավիչ դիրքով, ներդրումային  քաղաքականությամբ, հյուընկալ բնակչությամբ:

 Բյուրեղավանում գործում է հանրակրթական երկու դպրոց` «Բյուրեղավանի Ս. Վարդանյանի անվան ավագ դպրոց» ՊՈԱԿ-ը  և «Բյուրեղավանի հիմնական դպրոց» ՊՈԱԿ-ը: 2013 թվականի հունիսի 1-ին 120 երեխայի առջև իր հյուրընկալ դռները բացեց հիմնանորոգված Բյուրեղավանի «Արև» մանկապարտեզ ՆՈՒՀ ՀՈԱԿ-ը, որն իր շքեղությամբ ու հարմարավետությամբ չի զիջում նույնիսկ մայրաքաղաքում գործող մանկապարտեզներին: 2012 թվականի դեկտեմբերից 90-100 երեխա հաճախում է ավագ դպրոցում գործող նորակառույց, ժամանակակից չափանիշներին համապատասխան նախակրթարան: «Բյուրեղավանի արհեստագործական պետական ուսումնարան» ՊՈԱԿ-ում  սովորողները ստանում են միջնակարգ կրթության, նախնական  մասնագիտական կրթություն:  Բյուրեղավանում գործում է «Բյուրեղավանի երեխաներ խնամքի և պաշտպանության գիշերօթիկ հաստատություն»  ՊՈԱԿ-ը: Հաստատության գործունեության  նպատակը 6-18 տարեկան սոցիալապես անապահով երեխաների խնամքի, դաստիարակության, ուսուցման, բժշկական օգնության անվճար  կազմակերպումն է: «Բյուրեղավանի մանկապատանեկան մարզադպրոց» ՊՈԱԿ-ը հաճախակի կազմակերպում է մարզական-մասսայական միջոցառումներ, ցուցադրական ելույթներ, ակտիվորեն մասնակցում է բոլոր միջոցառումներին: Տարբեր սպորտաձևերի գծով դպրոցն ունի աշխարհի և Եվրոպայի առաջնությունների մասնակիցներ, ՀՀ բազմակի չեմպիոններ, միջազգային և հանրապետական մրցաշարերի հաղթողներ, մրցանակակիրներ: «Բյուրեղավանի  արվեստի դպրոց» ԱՈՒՀ ՀՈԱԿ-ն իր  արձանագրած  հաջողությություններով հայտնի է հանրապետությունում: Դպրոցում գործում են տարբեր երաժշտական գործիքների խմբեր, կերպարվեստի և պարի խմբակներ: Բյուրեղավանն ունի քաղաքային գրադարան, որի գրքային ֆոնդը  29.400 կտոր է: Գրադարանից օգտվում են ավելի քան  600 ընթերցողներ:  «Անդրանիկ Պետրոսյանի անվան Բյուրեղավանի քաղաքային պոլիկլինիկա» ՓԲԸ-ն  սպասարկում է ինչպես Բյուրեղավանի, այնպես էլ Նուռնուսի և  Արզնի համայնքի բնակչությանը: Աշխատում են բժիշկներ տարբեր մասնագիտությունների գծով` քիթ-կոկորդ, էնդոկրինոլոգ, սրտաբան, վիրաբույժ, գինեկոլոգ, մաշկավեներոլոգ, նյարդաբան, ատամնաբույժ,  մանկաբույժ,  ընտանեկան բժիշկներ: Կա սոնոգրաֆիկ ճառագայթային ախտորոշման ծառայություն, կլինիկական և բիոքիմիական լաբորատորիա,  ֆիզիոթերապևտիկ կաբինետ, «շտապ օգնության» ծառայություն: Համայնքի բնակիչները սպասարկվում են  հարմարավետ փոստային բաժանմունքում: Նորացված մալուխային համակարգը, ժամանակակից ծրագրերին համապատասխանող  համակարգիչները հնարավորություն են տալիս ավելի արագ և օպերատիվ փոստային, ֆինանսական և կոմերցիոն ծառայություններ մատուցել ազգաբնակչությանը:

Նուռնուս գյուղը հիմնադրվել է մ.թ 5-6-րդ դարերում: Մեզ հասած տեղեկությունների համաձայն անվանումն առ այսօր չի փոխվել: Գյուղում բնակվել են 7 տոհմեր և յուրաքանչյուրն ունեցել է իր եկեղեցին, որոնց փլատակները պահպանվել են առ այսօր: Հետագայում այդ տոհմերը միավորվել և դարձել են մեկ ընդհանուր համայնք` միասին ունենալով 365 ծուխ : «Նուռնուս» անվանումը կապվում է նռան հետ: Ինչպես գիտենք նուռն ունի 7 նիստ և 365 հատիկ: Գյուղի նախկին տեղում պահպանվել են քանդված եկեղեցիների փլատակները: Զանգվի ձորում պահպանվել են խաչքարերը և գերեզմանատունն ամբողջությամբ, որոնք hանդիսանում են զբոսաշրջությանը հետաքրքրող հուշարձաններ: Այդ տարածքները հիմա գտնվում են հուշարձանների պահպանության գոտում :
2005 թվականին համայնքի այգեգործական տարածքում բարերարների աջակցությամբ Արցախյան պատերազմում զոհված ազատամարտիկների հիշատակին կառուցվել է «Սուրբ Հարություն» եկեղեցին: Գյուղը գտնվում է նախալեռնային գոտում, մարզկենտրոնից 45 կմ հեռավորության վրա, ծովի մակերևույթից 1440 մ բարձրության վրա,  Հրազդան գետի ձախ ափին:  Տարեկան ամենաբարձր ջերմաստիճանը +33 աստիճան է, ամենացածրը դիտվել է -15-20 աստիճան: Գյուղում այժմ բնակվողների մեծ մասը վերաբնակվել են Ախտայի շրջանի Ալափարս գյուղից` բացառությամբ 4-5 ընտանիքների, որոնք 30-ականներին եկել են Արևմտյան Հայաստանից : Բնակչությունը հիմնականում զբաղվում է այգեգործությամբ, գյուղատնտեսությամբ և անասնապահությամբ: Բնակչության թիվը փաստացի կազմում է 670 մարդ , 156 ընտանիք: Գյուղի զբաղեցրած տարածքը 1457,01 հա է, որից` 304 հա արոտներ են, 256 հա՝ վարելահող, 304 հա՝ անտառ, 9 հա՝ այգիներ: Գյուղն ունի միջնակարգ դպրոց, բժշկական ամբուլատորիա և ջրամատակարարման սեփական համակարգ: Գյուղի վարչական տարածքում արտադրամասեր և ձեռնարկոթյուններ չկան:

Ջրաբեր գյուղը նախկինում եղել է հին հայկական բնակավայր, գյուղը գտնվում է Աբովյան քաղաքից  12կմ, մայրաքաղաքից 25կմ հեռավորության վրա, կիսալեռնային գոտում, ծովի մակերևույթից 1700-1800մ. բարձրության վրա: 18-րդ դարի վերջին գյուղը կոչվել է Նիկոլա-կա, որը եղել է աքսորավայր՝ մինչև 1916թ. բնակվել են մալականներ : Նրանց հեռանալուց հետո տարբեր շրջաններից բնակվելու են եկել գյուղ: 1924թ-ին գյուղը կոչվել է Նովի Նիկոլա-կա:  1948թ.-ին գյուղն իր ուժերով կառուցել է պոմպակայան, խողովակաշարով ջուր է հասցվել գյուղ, որի պատճառով գյուղը վերանվանվել է Ջրաբեր: Ջրաբերի վարչական տարածքը կազմում է 612.87 հա, որից գյուղատնտեսական ՝ 468.47 հա, վարելահող՝ 128.84հա: 2018թ.-ի տվյալներով բնակավայրն ունի 93 ընտանիք՝ 514 բնակչով: Գյուղում գործում է միջնակարգ դպրոց՝ 40 աշակերտով: Գործում է նաև բժշկական ամբուլատորիա: 2006թ.-ին բարերարի կողմից կառուցվել է «Սուրբ Մարիամ Աստվածածին» եկեղեցին: Բնակչության հիմնական զբաղմունքը անասնապահությունը, այգեգործությունն և դաշտավարությունն է։