Տեղեկացնում ենք, որ 2021 թվականի մարտի 1-ից Բյուրեղավանի «Արև» մանկապարտեզ նախադպրոցական ուսումնական հաստատությունը կվերսկսի աշխատանքը։
ՀՀ առողջապահության նախարարի 04․08․2020թ․ N 17-Ն հրամանի N 12 հավելվածի համաձայն՝ երեխաների խնամքի և կրթության գործընթացը կազմակերպվելու է բեռնաթափված խմբերով՝ առավելագույնը 20 երեխայի թվով։
Առաջնահերթություն կտրվի այն երեխաներին, որոնց տնային խնամքը գործնականում հնարավոր չէ ապահովել ծնողների կամ խնամակալների աշխատանքը հեռավար ձևով կազմակերպելու անհնարինությամբ և/կամ այլ օբյեկտիվ հանգամանքներով պայմանավորված: Այն երեխաները, որոնց ծնողները կամ խնամակալները երեխաներին մանկապարտեզ ուղարկելու մտադրություն կհայտնեն, նախապես կցուցակագրվեն:
Մանկապարտեզը ձեռնպահ կմնա լրացուցիչ ընդունելություն կազմակերպելուց, բացառությամբ՝
—այն հերթագրված երեխաների համար, որոնց տնային խնամքը գործնականում հնարավոր չէ ապահովել՝ ծնողների կամ խնամակալների աշխատանքը հեռավար տարբերակով կազմակերպելու անհնարինությամբ պայմանավորված,
—առաջին կամ երկրորդ կարգի հաշմանդամություն, երեք և ավելի երեխա ունեցող կամ զինծառայող ծնողի երեխաների համար,
—կրթության և զարգացման առանձնահատուկ պայմանների կարիք ունեցող երեխաների,
—սոցիալապես անապահով ընտանիքների երեխաների համար։
Հիշեցնում ենք, որ Բյուրեղավանի «Արև» մանկապարտեզ ընդունելությունն այսուհետ լինելու է միայն էլեկտրոնային եղանակով՝ ըստ հերթագրման հերթականության։
Դիմել կարող են 2-5 տարեկան բոլոր երեխաների ծնողները, ընդունվելու են 3-5 տարեկանը լրացած երեխաները։
Առցանց հերթագրման ուղեցույցին կարող եք ծանոթանալ byureghavan-kotayq.am կայքում՝ «Մանկապարտեզներ» բաժնում՝ «Առցանց հերթագրման դիմում» վերնագրի տակ կոճակը սեղմելով։
Բյուրեղավանի «Արև» մանկապարտեզ առցանց դիմում ներկայացնողները պետք է համակարգ ներբեռնեն հետևյալ փաստաթղթերը․
—Երեխայի ծննդյան վկայականի լուսապատճենը,
—Ծնողի անձնագրի լուսապատճենը,
—Հաշվառման վերաբերյալ տեղեկանք՝ ոստիկանության անձնագրային խմբից։
Մանկապարտեզ ընդունվելու առաջնահերթության իրավունք ունեցող երեխաների ծնողներին խնդրում ենք 3-րդ քայլի ժամանակ նշել «Արտոնություն» կոճակը և կցել արտոնությունը հաստատող փաստաթղթերը, եթե առկա են նշված պայմաններից որևէ մեկը՝
—Չորս և ավելի երեխա ունեցողների դեպքում՝ բոլոր անչափահաս երեխաների ծննդյան վկայականների լուսապատճենները,
—Զինծառայող ծնողների երեխաների դեպքում՝ տեղեկանք համապատասխան զորամասից:
Տեղեկացնում ենք նաև, որ ոչ բյուրեղավանաբնակ (ունեն մշտական հաշվառում այլ համայնքներում, բացառությամբ՝ ՀՀ պաշտպանության նախարարության զորամասերում ծառայող զինծառայողների) երեխաների համար վարձավճարի չափը կրկնակի է՝ 16 000 դրամ (հիմք՝ Բյուրեղավան համայնքի ավագանու 11.12.2020թ. N 48-Ն որոշում):
Հարցերի դեպքում կարող եք զանգահարել 0222 6-52-03 հեռախոսահամարով, դիմել Բյուրեղավանի համայնքապետարան, կամ «Արև» մանկապարտեզ։